Neges bwysig o gefnogaeth i’n hymgyrch i recriwtio mwy o ofalwyr maeth o blith pobl dduon a lleiafrifoedd ethnig gan Gomisiynydd Plant Cymru
“Mae maethu yn wasanaeth hanfodol sydd yn medru cynnig amgylchedd diogel a chariadus i rai o’r plant mwyaf bregus.
“Mae plant sydd yn mynd i’r system ofal yn dod o amryw o gefndiroedd, ac felly, mae’n bwysig iawn ein bod yn cael ystod eang o ofalwyr maeth arfaethedig hefyd.
“Gyda phlentyn sydd yn mynd drwy brofiad ansicr ac anodd, mae teulu maeth sydd yn deall cefndir diwylliannol y plentyn, yn siarad iaith gyntaf y plentyn neu’n arfer yr un grefydd yn medru gwneud gwahaniaeth mawr er mwyn helpu’r plentyn hwnnw i deimlo’n ddiogel ac yn gysurus.
“Mae teuluoedd yn amrywio o ran siâp, maint, lliw a diwylliant, ac mi ddylai teuluoedd maeth adlewyrchu hyn – rwyf yn annog unrhyw un sydd wedi ystyried maethu i gysylltu gan fod yna blant o gefndiroedd amrywiol sydd angen y cymorth hwnnw.”
Rocio Cifuentes yw Comisiynydd Plant Cymru; mae hi wedi llenwi’r rôl yma ers Ebrill 2022.
Pwrpas ei swydd yw dweud wrth eraill am bwysigrwydd hawliau plant, ac i edrych ar sut mae penderfyniadau cyrff cyhoeddus yng Nghymru, yn cynnwys Llywodraeth Cymru, yn effeithio ar hawliau plant.
